RightClick

ஆண்டுக்கு ஒருமுறை பூக்கும் செங்காந்தாள் : மேற்கு தொடர்ச்சி மலையில் பூத்துள்ளது

ராஜபாளையம்: ஆண்டுக்கு ஒருமுறை பூக்கும், மருத்துவ குணம் கொண்ட, செங்காந்தாள் மலர்கள், விருதுநகர் மாவட்டம், ராஜபாளையம், மேற்கு தொடர்ச்சி மலையடிவாரத்தில் பூத்துள்ளன. குளிர்ச்சியான இடம், நீர்நிலைகள் அருகே, செங்காந்தாள் செடிகள் வளரும். இதன் மலர்கள் சிவப்பு, வெளிர்மஞ்சள் நிறத்தில் இருக்கும். தண்டும், மலரும் மருத்துவ குணமுடையவை. ஆண்டுக்கு ஒரு முறை, கார்த்திகை மாதத்தில் மட்டும் பூக்கும், இந்த பூக்கள், ராஜபாளையத்தில், மேற்கு தொடர்ச்சி மலையடி வாரத்தில், தற்போது பூத்துள்ளன.

இந்த மலர் பற்றி, சித்த மருத்துவர் ஒருவர் கூறியதாவது: இந்த செடியின் மலர்கள் சிவப்பு, கருப்பு, வெள்ளை நிறம் என, மூன்று வகைகளாக உள்ளன. சிவப்பு பூக்கள் மட்டும் அதிகமாகவும், மற்றவை அரிதாகவும் காணப்படும். செடியின் கிழங்கு விஷத்தன்மையுடையது. பசுவின் கோமியத்தில் ஊறவைத்து, நஞ்சு முறிக்கப்பட்டு, பாதரசத்துடன் கலந்து, சித்த மருத்துவத்தில், வலி நிவாரணி மருந்துகள் தயாரிக்க பயன்படுகிறது. இந்த மலர்கள், சமீப காலமாக வெளிநாட்டிற்கும் ஏற்றுமதி செய்யப்படுகின்றன. இவ்வாறு சித்த மருத்துவர் கூறினர்.
Click Here